ایم بی بی ایس اور بی ڈی ایس کے داخلہ ٹیسٹ
کراچی (اسٹاف رپورٹر)ڈاو یونیورسٹی آف ہیلتھ سائنسز کے تحت ڈاو میڈیکل کالج ، سندھ میڈیکل کالج اور ڈاکٹر عشرت العباد خان انسٹیوٹ آف اورل ہیلتھ سائنسز میں ایم بی بی ایس اور بی ڈی ایس سال اول میں داخلوں کے لئے انٹری ٹیسٹ اتوار کو ایکسپو سینٹر میں منعقد کیا گیا۔ ٹیسٹ میں چھ سو پچاس نشستوں کے لئے سوا پانچ ہزار طلبہ نے شرکت کی والدین کے انتظار کے لئے شامیانے لگائے گئے تھے جو کم پڑ گئے جبکہ پانی کا کوئی مناسب انتظام نہیں کیا گیا تھا ، ایک معذور امیدوار عائشہ نے شکایت کی اسے ایڈمٹ کارڈ جاری کرنے سے منع کردیا گیا جب کہ کئی اور افراد نے بھی یہ شکایت کی کہ انہیں ایڈمٹ کارڈ جاری نہیں کئے گئے ڈاؤ یونیورسٹی کی پریس ریلز کے مطابق امیدواروں کومیڈیکل ایمرجنسی کی سہولت فراہم کی گئی تھی اور ٹیسٹ سے قبل طلبا وطالبات کی رہنمائی کے لئے ہیلپ ڈیسک بھی قائم کی گئی تھی تاکہ وہاں سے کمپیوٹر کے ذریعے گمشدہ ایڈمٹ کارڈزکی ڈپلیکیٹ جاری کی جاسکے۔ طلبا وطالبات کو مشینی گیٹ سے ہالز میں داخل کیا گیا۔ انٹری ٹیسٹ میں نگرانی کے فرائض ڈاؤ یونیورسٹی کی فیکلٹی نے سرانجام دیئے جبکہ طلبا وطالبات کو اسٹیشنری بھی یونیورسٹی کی طرف سے فراہم کی گئی تھی۔ طلبہ کی آسانی کے لئے ایڈمٹ کارڈ کے ساتھ سیٹوں کی نشاندہی کیلئے نقشہ بھی دیا گیا تھا۔ ڈاؤ یونیورسٹی کے وائس چانسلر، پروفیسر مسعود حمید خا ن نے ہیلپ لائن کے اسٹالز کی خود نگرانی کی اور طلبہ کی مشکلات کو حل کیا جبکہ پرو وائس چانسلر ڈاؤ یونیورسٹی پروفیسر صلاح الدین افسر اور سندھ میڈیکل کالج کے پرنسپل پروفیسر شرافت اللہ نے فیکلٹی ارکان کے ہمراہ ٹیسٹ کی نگرانی کی۔ انٹری ٹیسٹ میں جوابات کی شیٹ کی کاربن کاپی تمام امیدواروں کو دے دی گئی تاکہ وہ ڈاؤ یونیورسٹی کی ویب سائٹ پر آنسر کی Answer Key کی مد د سے اپنے جوابات خود چیک کرسکیں جو ٹیسٹ ختم ہونے کے بعد اسی دن ویب سائٹ www.duhs.edu.pk پر لوڈ کردی گئی ہے۔ جبکہ نتائج کا باقاعدہ اعلان تین چار دن بعد کیا جائے گا۔دلچسپ امر یہ ہے کہ پنجاب میں میرٹ برقرار رکھنے کے لئے میڈیکل کالجوں سے اس سال سیلف فنانس اسکیم ختم کردی گئی ہے مگر کراچی سمیت سندھ کے تمام سرکاری میڈیکل کالجوں میں سیلف فنانس اسکیم جاری ہے۔
شکریہ روزنامہ جنگ