خیرپور میں 3طلباء کی ہلاکت:معلوم ہوتا ہے پولیس ملزمان کو تحفظ دے رہی ہے،سپریم کورٹ
اسلام آباد(نمائندہ جنگ) سپریم کورٹ نے خیرپور میں ایک مبینہ پولیس مقابلے میں جاگرانی قبیلے کے تین طالبعلموں کی ہلاکت کے خلاف سوموٹو نوٹس کیس کی سماعت کرتے ہوئے آبزرویشن دی ہے کہ معلوم ہوتا ہے کہ پولیس افسران ملزمان کو تحفظ فراہم کر رہے ہیں کیونکہ ملزمان کا تعلق بھی پولیس ڈپارٹمنٹ سے ہی ہے۔ فاضل عدالت نے پولیس حکام کو ملزمان کی گرفتاری کیلئے آخری مہلت دیتے ہوئے مزید سماعت27 فروری تک ملتوی کردی۔ کیس کی سماعت چیف جسٹس مسٹر جسٹس عبدالحمید ڈوگر کی سربراہی میں جسٹس سید زوار حسین جعفری اور جسٹس محمد فرخ محمود پر مشتمل تین رکنی بنچ نے کی۔ عدالت نے کہا کہ پولیس رپورٹ مکمل طور پر گمراہ کن ہے کیونکہ ملزم کی عبوری ضمانت کی منسوخی کیلئے درخواست بھی مناسب طور پر دائر نہیں کی گئی۔ فاضل عدالت نے پی پی او سے آئندہ سماعت پر ملزمان پولیس افسران کیخلاف محکمانہ کارروائی کی رپورٹ طلب کرلی۔ دریں اثناء فاضل عدالت نے خالد بن ولید روڈ کراچی میں ایک مبینہ پولیس مقابلے میں کوئٹہ کے چار تاجروں کی ہلاکت کے سوموٹو نوٹس کیس میں مزید سماعت 27فروری تک ملتوی کردی ۔
[/rtl] شکریہ جنگ