احسن اقبال پر فائزنگ واقعہ پر بی بی سی اردو کی رپورٹ
پاکستان کے وزیر داخلہ احسن اقبال نامعلوم شخص کی فائرنگ سے زخمی ہو گئے ہیں۔
پاکستان کے سرکاری ذرائع ابلاغ کے مطابق وزیر داخلہ احسن اقبال اپنے حلقے نارووال کے علاقے کنجڑوڑ میں ایک کارنر میٹنگ میں شریک تھے۔
مقامی پولیس اہلکار نے بی بی سی کو بتایا کہ یہ کارنر میٹنگ احسن اقبال کے آبائی گاؤں کے قریب علاقے میں ہو رہی تھی جہاں وفاقی وزیر مسیحی برادری سے خطاب کر رہے تھے۔
مقامی ایس ایچ او شہباز احمد نے بی بی سی کو بتایا کہ جیسے ہی کارنر میٹنگ ختم ہوئی وہاں موجود ایک شخص نے اُن پر گولی چلائی جس سے وزیر داخلہ زخمی ہو گئے۔
حملے کے بعد احسن اقبال کو ضلعی ہسپتال نارووال منتقل کیا گیا ہے۔
احسن اقبال کے بیٹے احمد اقبال نے مقامی ٹی وی چینل کو بتایا کہ احسن اقبال کی حالت خطرے سے باہر ہے اور وہ ہوش میں ہیں۔
انھوں نے بتایا کہ احسن اقبال کو جلد لاہور منتقل کر دیا جائے گا۔
وزیر مملکت برائے داخلہ طلال چوہدری نے مقامی ٹی وی چینل سے بات چیت کرتے ہوئے بتایا کہ حملہ آور کی فائرنگ سے احسن اقبال کے دائیں گندھے پر گولی لگی۔
انھوں نے بتایا کہ حملہ آور کو گرفتار کر لیا گیا اور طلال چوہدری کے مطابق مشتبہ حملہ آور کی عمر 20 سے 22 سال ہے۔
اس بارے مزید اطلاعات ابھی فراہم کی جا رہی ہیں۔